Бившиот планинарски водич и алпинист Џеј Филбрик нуди адреналинска и екстремна свадбена фотосесија носејќи ги младите парови да позираат на работ од карпа на висина од 106 метри над длабока провалија. Нормално, сето тоа обезбедено со потребната алпинистичка опрема за да се спушти парот дотаму и под строги и прецизни инструкции од самиот фотограф кој има големо искуство во алпинизмот.

„Ги спуштаме невестата и младоженецот до гребенот со помош на специјализирана опрема за таков потфат, каде ја правиме фотосесијата. Безбедноста е на високо ниво со сета таа опрема. Всушност, ние повеќе ризикуваме за време на возењето до самото место и назад, отколку што има ризик во самиот потфат, кој пак, од друга страна, нуди импресивно адреналинско искуство кое трајно се врежува во меморијата на младите парови“, вели идејниот творец на ваквиот начин на свадбена фотосесија, Филбрик.

Денес предсвадбените фотосесии се тренд кој го практикуваат младите брачни парови и позираат во најразлични отворени средини, од паркови, локалитети со стара архитектура, напуштени објекти, полиња и други нестандардни локации кои веќе влегоа во концептот за венчални фотографии. Сепак, понудата од Филбрик, со својот адреналински сегмент, е нешто кое ги надминува и овие неконвенционални фотографски производи. Уникатно и незаборавно, со два збора кажано.

„Често висам над провалијата, пред самиот гребен, некогаш над местото каде што позираат младоженците, а некогаш сум и заедно со младиот пар на самата ивица каде што се прави фотосесијата“, објаснува Џеј. Фотошоп уредувањето на фотографиите е сведено на минимум, сепак, Филбрик вели дека често ги отстранува во постпродукција оние природни елементи кои му пречеле во кадарот, како безбедносната опрема која ја носат младоженците.

Целиот потфат трае 90 минути, а гребенот на кој се прави фотосесијата се наоѓа на White Mountains во Њу Хемпшир.

Идејата на Филбрик би можела да ги инспирира и мотивира и македонските фотографи кои работат свадбена фотографија да се обидат да воведат вакви или слични иновативни пристапи кон предсвадбените фотосесии за младите брачни парови кај нас. Во меѓувреме, ѕирнете тука што можат да направат "нашите", и тоа на попуст, по супер цена, само за Вас ☻